لسلام عليكم
...كش ما بقا ؟؟؟
البارح روحت في تاكسي و تخلعت
اليوم روحت فال bus و شبعت choc
نقلكم علاه
أمالي انا كنت قاعدة فالبيس جا طلع راجل مع طفلة صغيرة
تهببببببببببل ربي يبارك و لابسة rose et rouge
قالها الراجل هاداك
**أرواحي بنتي اوقفي هنا قدام اختك الكبيرة **
الي هيا انا
قتلو ارواح عمي اقعد انت وياها قالي لا والله ما تصرا غير خليها قدامك
هزيت انا الطفلة قعدتها في حجري الله يرحم الكرش الي جابتها
هاديك الريحة الي فيها و شعرها كيفاه ممشوط تسخف ربي يبارك قعدت في حجري ما تحركت لاهك لا هك مبعد صونا تيليفوني vibra فيها
قاتلي خالة تيليفونك راه يصوني
هادا وش سمعت من صوت الطفلة هادي ربي يحفظها
هاارواحو تشوفو ضرك ........
ركبت طفلة اخرىالشعر تكشيردة تاع شهر
القندورة موسخة نص رجلها على برا من السباط ياااااااااااه تشوكي
باينة تاعنا
دزت مامها و طلعت
قالها الروسوفار شفيت عليك انتي القبيحة الي ركبت معايا الخطرة الي فاتت قاتلو هيه انا من بكري قبيحة وش دخلك
قالها ضرك نطيرلك خشمك قاتلو تقيسيني نعميك
و مبعد دارت للطفلة اللي كانت في حجري
قاتلها نعتي نشوف التكالل تاعك و جبدتها من ودنها
قاتلها اااااا تاعي خير
برقاقة من الصغر
المخلوقة الي كانت في حجري تشوكات فيها
بقات غير تشوف الصنف هادا منين جا
و مبعد كي جات تنزل عطيتها حلوى شافت مع باباها قبل ما تحكمها حتى خلاها بش حكمتها و قاتلي صحيتي خالتي
السؤاااااااال يا جماعة
وينها الطفولة ؟؟؟
انا راني نشوف يفوتو 6 سنين خلاص يوليو الكفريات كل يعرفهم
دعاوي الشر كيف
ما تبقى حتى طفولة و لا وش قلتو
الجمعة أبريل 30, 2010 1:49 pm
